Здравата исхрана во текот на бременоста е од клучно значење, таа е важна за здрав развој на бебето, есенцијална е за здравјето на мајката, а и секако придонесува мајката да се чувствува здраво и активно во изборите кои ги прави за својата бременост.
На курсот за трудници на мамма.мк зборуваме подетално за здравата исхрана, за совети околу исхраната, листи на хранливии материи важни за раст и развој на бебенцето, како и храна која треба да се избегнува во бременоста и безбедно ракување со храната во бременоста.
Секогаш ја потенцирам важноста на исхраната во бременоста, ова е период кога треба навистина да внимаваме на храната што ја внесуваме и да правиме здрави избори.
Би сакала да ви дадам неколку совети кога станува збор за исхрана во бременоста.
Вода, вода, вода
Од клучно значење е да внесувате доволна количина на течности во бременоста. Водата може да ублажи голем дел од непријатните симптоми на бременоста како запек, главоболки, киселини, отоци, вртоглавица итн.
Омега масни киселини
Омега масните киселини се од значајни за растот на мозокот на бебенцето. Се препорачува бремените жени да вклучуваат риба на нивното мени, која содржи ниски количества на жива, за одличен извор на омега-3, протеини, витамини и минерали.
Јајца
Јајцата ( кои треба да се целосно варени) се добар избор на храна во бременоста бидејќи содржат протеини, омега-3 масни киселини, холестерол и многу корисни витамини и минерали.
Супер храна
Супер храна ги нарекуваме намирниците кои се преполни со здрави хранливи материи. Супер храната е одличен избор за во бременоста а може да вклучува бобинки, мешунки, јаткасти плодови, темно зелен зеленчук, целозрнести житарки, слатки компири итн …
